Тошкент шаҳрида нақд пулга савдо қилган МЧЖ раҳбари Даврон Садиров судланди. Бу ҳақда “Ҳуқуқ” газетаси хабар бермоқда.
Келтирилишича, Садиров Uzdial номли МЧЖ ташкил қилиб, темир-бетон маҳсулотлари ишлаб чиқара бошлаган. У бошқа бир МЧЖ билан 60 млн сўмлик маҳсулот етказиб бериш бўйича сохта шартнома тузган. Амалда эса маҳсулотни шартнома асосида эмас, нақд пулга сотиб юборган.
Сўнг Садиров омбор мудири Серик Тангиров билан тил бириктириб, жамият томонидан ишлаб чиқарилган 21 турдаги 208 млн 750 минг сўмлик темир-бетон маҳсулотларини оғзаки келишув асосида нақд пулга сотиб юборган. Ниҳоят, ишлаб чиқариш цехи бошлиғи Султон Қораев билан тил бириктириб, 36 турдаги 12 млн 354 минг сўмлик арматурани нақд пулга сотиб юборган.
Миробод туман суди бу уч ҳолатни кўриб чиқиш, Даврон Садировга тегишли жазо белгилаган.