АҚШнинг Стемфорд шаҳридаги хонадонлардан бирида яшовчи мушук уй эгаларини уйдан чиқариб юборди ва бу ҳолат 4 соат давом этди. Бу ҳақда CBS NewYork нашри хабар берган.

Уй эгаси Муҳаммад Локман 911 қутқарув операторига мурожаат қилиб, ёрдам сўраган, оператор воқеа жойига полиция ходимлари жўнатилишига ваъда берганидан кейингина 3,6 килограмли жаҳлдор мушук келтириб чиқарган муаммо бартараф этилган ва уйига кира олган.

"Мушугим бирдан ўта жаҳлдор бўлиб қолди. У уй ичида менга ташланавергач, рафиқам билан ташқарига қочиб чиқишга мажбур бўлдик ва 3-4 соат давомида ичкарига кира олмадик", деб маълум қилган у.

Локман айни вақтда мушуги ўзини яхши тутаётганини билдирган. Унинг қайд этишича, ҳалигача 1,5 йилдан бери бундай қилиқ чиқармаган мушугида нега бундай ўзгариш бўлиб ўтганини тушуна олмаяпти.