"Тошкент" халқаро аэропорти дунёнинг энг замонавий аэропортларидан бири бўлмиш "Инчхон" (Жанубий Корея) аэропорти технологиялари ва тажрибалари асосида модернизация қилинади. Бу ҳақда KOICA агентлигининг Ўзбекистондаги фаолиятига 20 йил тўлиши муносабати билан ташкил қилинган симпозиумда айтиб ўтилди.

"Яқин вақтларда Тошкентга Жанубий Кореядан техник гуруҳ келиши кутилмоқда. Бу ходимлар аэропортни ўрганиб, ҳолатни баҳолашади ва ўз таклифларини тақдим қилишади", дейди Корея халқаро ҳамкорлик агентлиги вице-президенти Чве Сонг Хо.

"Бу лойиҳанинг молиявий жиҳатлари ҳақида ҳозирча аниқ маблағни айтиш қийин. Ишлар 2016 йил охиригача тугатилиши мумкинлигини айтиш мумкин. Аниқ маълумотлар техник гуруҳнинг хулосаларидан кейин айтилади", дея қўшимча қилади у.

Ўзбекистон томони эса бу лойиҳа қийматини 312 млн доллар атрофида бўлишини айтмоқда. Модернизациядан кейин терминал соатига 1,5 минг кишига хизмат кўрсатиш қобилиятига эга бўлиши кутилмоқда.