Янги Зеландияда ўтаётган ёшлар ўртасидаги жаҳон чемпионатининг "F" гуруҳи ўйинлари якунланди.

Ўзбекистон ёшлар терма жамоаси гуруҳнинг сўнгги ўйинида Фижи термасига қарши майдонга тушиб, 3:0 ҳисобида ғалаба қозонди.

Гондурас ва Германия ёшларидан учралган мағлубиятдан сўнг кўпчилик Ўзбекистоннинг имкониятини паст баҳолаётган эди. Аммо ҳал қилувчи беллашувда футболчиларимиз ўз зиммаларига юклатилган дастлабки вазифани уддалашди.

Биринчи бўлимда ҳисоб очилмаган бўлса, ўйиннинг 62 ва 63 дақиқаларида Илҳом Шомуродов ва Забиҳулло Ўринбоев кетма-кет тўп киритишиб, вазиятни ўз томонларига оғдиришди. Ўйиндаги якуний натижа эса 93 дақиқада Миржамол Қосимов томонидан ўрнатилди - 3:0.

Бу ғалабадан кейин гуруҳда 3 очко ва тўплар нисбати нисбатан яхшилиги эвазига иккинчи ўринни эгаллаган ўзбекистонликлар кейинги босқичга чиқишди. Чунки гуруҳдаги иккинчи беллашувда Германия 5:1 ҳисобида ғалаба қозониб, Ўзбекистоннинг иккинчи ўринни эгаллашини таъминлаб берди. Гуруҳда Германия 9 очко билан биринчи ўринни эгаллади. Қолган 3 жамоа эса 3тадан очко жамғаришди. Тўплар нисбати Ўзбекистонда (-1), Гондурасда (-6), Фижида эса (-7) бўлди.

Энди Ўзбекистон термаси 11 июнь куни Австрия ёшларига қарши нимчорак финал ўйинида майдонга тушишади.

Ўзбекистон  U-20 - Фижи U-20 3:0

Голлар: Илҳом Шомуродов (62), Забиҳулло Ўринбоев (63), Миржамол Қосимов (90+3)