6 июнь куни Тошкент шаҳар Учтепа тумани ҳокимлиги томонидан тадбиркорлар учун ташкил учрашув ташкил этилди. Унда Президент Ислом Каримов раҳнамолигида мамлакат иқтисодиётида хусусий мулкнинг ўрни ва ролини ошириш, хусусий мулк ва тадбиркорликни ривожлантириш йўлидаги тўсиқ ва чекловларни бартараф этишга алоҳида эътибор қаратилаётгани таъкидланди

Тадбирда Тошкент шаҳар ҳокими Р.Усмонов иштирок этди. 

Учтепа туманида 4600дан зиёд тадбиркорлик субъекти рўйхатдан ўтказилган бўлиб, шундан 4100 дан ортиғи кичик бизнес субъектидир. Туманда “Электроизолит”, “Шайхонтоҳуртекстил” ҳамда “Байпак текстил” сингари йирик саноат корхоналари фаолият кўрсатмоқда. 

Тадбиркорлик субъектларининг туман иқтисодиётидаги салмоғи тобора ошиб бормоқда. Хусусан, 2014 йилда саноат маҳсулотлари ишлаб чиқаришда кичик бизнеснинг улуши 90,1 фоизни, хизмат кўрсатишда 56, юк ташишда 94,1, қурилиш ишларида 93,2 фоизни ташкил этди. Туманда яратилган янги иш ўринларининг 67,3 фоизи тадбиркорлар ҳиссасига тўғри келади. 

Ўтган йилда туманни ижтимоий-иқтисодий ривожлантириш дастури доирасида ҳудуддаги 292 корхонага инвестиция киритилиши натижасида касб-ҳунар коллежларининг икки мингдан ортиқ битирувчиси иш билан таъминланди. 

"Тадбиркорларнинг қонуний ҳуқуқ ва манфаатларини ҳимоялаш прокуратура органларининг асосий фаолият йўналишларидан ҳисобланади. Жорий йилнинг ўтган даврида туман прокуратураси томонидан ўтказилган текширувлар натижасида тадбиркорларнинг ҳуқуқ ва қонуний манфаатлари бузилган ўнта ҳолат аниқланиб, айбдор шахсларга нисбатан тегишли чоралар кўрилди", – дейди Учтепа тумани прокурори ёрдамчиси Асрор Турғунов. 

Учрашувда маҳаллий давлат ҳокимияти органлари ва ҳуқуқни муҳофаза қилувчи идоралар вакиллари томонидан тадбиркорларга фаолиятининг қонун билан белгиланган кафолатлари, солиқ ва божхона имтиёзларига доир масалалар юзасидан тушунчалар берилди. Тадбиркорларнинг саволларига мутасадди идоралар масъул ходимлари жавоб қайтарди.