Тошкент шаҳри аҳолисининг фикрича, ҳар йили шаҳар йўллари таъмирланади, лекин улар сифатсиз бажарилгани боис, кейинги йилга яна таъмирталаб бўлиб қолаверади.

Фейсбук тармоғидаги “Жамоатчилик назорати” гуруҳи иштирокчиларидан бири ёзишича, шу кунларда “Дўстлик” метро бекати атрофида йўлга асфальт ётқизилаяпти-ю, бироқ  яна сочилиб кетмоқда. Сабаби ётқизилаётган асфальт устидан машина ва автобуслар бемалол ўтиб кетишмоқда. Фойдаланувчи бундай пайтда йўллар вақтинча тўсиб қўйилиб, асфальт билан ямалмасдан, тўлиқ ётқизилса бўлмайдими, деган фикрни билдирган.

Гуруҳ иштирокчилари, шунингдек, Самарқандда ҳам йўлларни  ямаб қўйиш ҳолатлари кузатилаётганини айтишган. Улар ҳар литр ёқилғидан йўл харажатлари учун солиқ олинаётганини, агар ушбу солиқлар фақат йўл учун сарфланганда, “Монакодаги Формула-1 автопойгалари ўтказиладиган йўлдай бўлиши керак”, деган фикрни ҳам ёзиб қолдиришган.