Ўзбекистон Вазирлар Маҳкамасининг қарори билан умумий қиймати 362 млн долларни ташкил қиладиган 2015-2017 йилларга мўлжалланган Сурхондарё вилояти саноат салоҳиятини ривожлантириш дастури қабул қилинди.

Ҳужжат янги ишлаб чиқариш, амалдагиларини модернизациялаш, техник ва технологик қайта жиҳозлаш, минерал-хомашё ресурсларини чуқур қайта ишлаш ва тайёр маҳсулот ишлаб чиқаришни кенгайтиришга йўналтирилган.
Дастурда озиқ-овқат саноати, жумладан, мева-сабзавот, қандолатчилик ва гўшт-сут саноатларининг зарурий хомашё базасини кенгайтириш билан янги замонавий қайта ишловчи ишлаб чиқаришларини ташкил этиш кўзда тутилган.

Умумий дастур доирасида саноатнинг алоҳида соҳаларининг ривожланишига йўналтирилган манзилли дастурлар ҳам тасдиқланган.
Озиқ-овқат саноатига қаратилган манзилли дастурда вилоятда умумий миқдори 21,6 млн долларлик 47 лойиҳани амалга ошириш кўзда тутилган. Бу лойиҳалар корхоналарнинг шахсий маблағлари (8 млн доллар) ва тижорат банклари маблағлари (13,5 млн доллар) ҳисобига молиялаштирилади.
Енгил саноат маҳсулотлари ва бошқа ноозиқ-овқат маҳсулотларини ишлаб чиқариш бўйича манзилли дастурида умумий миқдори 63,2 млн долларни ташкил қилувчи 37 лойиҳанинг амалга оширилишини кўзда тутади.

Қурилиш ва безак материллари ишлаб чиқариш дастурига кўра 261,3 млн долларлик 86 та лойиҳа амалга оширилади.
Шунингдек, манзилли дастур доирасида машинасозлик ва ишлаб чиқариш-техник вазифасига эга маҳсулотларни ишлаб чиқариш, кимё саноатида 15,9 млн долларлик 9 та лойиҳани амалга ошириш режалаштирилган.