Ўзбекистон Халқ таълими вазирлиги Тошкент шаҳри Яккасарой туманида жойлашган 91-сонли умумий ўрта мактабда пул йиғилмагани ва бу ҳақда UZ24 сайтида чоп этилган шикоят асоссиз эканлигини айтди.

UZ24 сайтига йўлланган мактубда шикоятда айтилган ҳолатларни аниқлаштириш учун мактаб директори А.Темирова ва синф раҳбарлари билан суҳбат ўтказилганлиги маълум қилинди.

Суҳбат давомида 91-мактабда пул йиғилмагани ва шикоят асоссиз эканлиги маълум бўлди.
Мактаб маъмурияти ва синф раҳбарлари Ўзбекистон Республикаси Адлия вазирлигида 2012 йил 3 июлда 2377-рақам билан рўйхатдан ўтказилган “Халқ таълими муассасасининг васийлик кенгаши тўғрисидаги намунавий низом”нинг 24-бандида кўрсатилган шартларга риоя қилиш керакликлари ҳақида огоҳлантирилди.

Бу бандда: “Таълим муассасасида ўқувчилар (тарбияланувчилар) ва уларнинг ота-оналари (қонуний вакиллари)дан турли хил сабаблар билан таълим муассасаси раҳбарияти ва бошқа ходимлари (синф раҳбарлари, ўқитувчилар, тарбиячи, тарбиячи-ёрдамчилар ва тўгарак раҳбарлари) томонидан пул маблағларини йиғиш қатъиян тақиқланади”, дейилган.

Мактубда 24-банднинг 2-абзацига кўра, ота-оналар таълим муассасасида пул маблағларининг йиғилиши ҳолатлари ҳақида оғзаки ёки ёзма равишда бевосита Кенгашга мурожаат қилишлари мумкинлиги, бундай ҳолат юз берган тақдирда, Кенгаш томонидан Халқ таълими муассасалари фаолиятини методик таъминлаш ва ташкил этиш туман (шаҳар) бўлимларининг раҳбар ходимлари иштирокида муҳокама этилиши ҳамда айбдор шахсларни қонун ҳужжатларида белгиланган тартибда жавобгарликка тортиш чоралари кўрилиши кўрсатилган.