Брюсселдаги Таъм ва сифат халқаро институти кетма-кет учини марта афғон шафранини (заъфарон – зиравор ўсимлик) дунёдаги энг яхши шафран деб топди, деб хабар бермоқда афғон ОАВлари. Афғон шафрани дунёнинг турли бурчакларидан келтирилган 300 дан ортиқ намунадан энг яхшиси деб топилди.

Уч юлдуз кўринишидаги мукофот институт томонидан топшириладиган энг нуфузли мақом ҳисобланади.

Афғонистон қишлоқ хўжалиги ва ирригация вазирлигининг маълумотларига кўра, Афғонистон ўтган йили ушбу зиравордан 4 тонна етиштирган ва 23 та вилоятга ушбу ўсимлик уруғидан тарқатиб чиққан.

Шафран Афғонистон иқлимида кўкнори ўрнини босувчи истиқболли қонуний ўсимликлардан бири ҳисобланади.

Шафран – тўқ сариқ рангдаги зиравор ва озиқ-овқат бўёғи ҳисобланади. У шафран гули уруғчиларини қуритиш йўли билан олинади. Ўтмишдан энг қимматбаҳо зираворлардан бири ҳисобланади, чунки уни етиштириш жуда сермашаққат иш бўлиб, битта гул бор-йўғи учта уруғчи беради. 1 кг шафран зираворини олиш учун эса 200 мингта гул талаб этилади. Дунёда етиштириладиган бутун шафраннинг 90 фоизи Эронда йиғилади.