2015 йил 9 июнь куни Тошкент шаҳрида жойлашган «Ўзбекистон» спорт саройида бокс бўйича 1999-2000 йилларда таваллуд топган ёш чарм қўлқоп усталари ўртасида Осиё чемпионатининг учинчи кун учрашувлари бўлиб ўтди.

Мазкур кунги баҳслардан ўрин олган 13 жангнинг учтасида ўзбекистонлик боксчилар рингга кўтарилишди. Муроджон Алиев (52 кг.гача вазнда) қозоғистонлик рақиби Саматали Талтаевни 2:1, Билолбек Мирзарахимов (57 кг.гача) жанубий кореялик Жан Хунг Кимни 3:0 ва Темур Миржонов (63 кг) филлипинлик Ранжо Гила Наполесни 2:1 ҳисобида малуб этиб мусобақанинг кейинги босқичига йўл олишди.

Бугун, 10 июнь куни яна 12 жанг ўтказилиши режалаштирилган. Ўзбекистонликлардан Ҳалимбек Утегенов (46 кг) қирғизистонлик Рустам Муратовга, Жаҳонгир Раҳмонов (57 кг) мўғулистонлик Баямбатсогт Тугулдурга, Темурбек Саъдуллаев (60 кг) афғонистонлик Мужибуллоҳ Эҳсонга қарши рингга кўтарилишади.

Эслатиб ўтамиз, 8 июнь кунги жангларда Баҳодир Баратов (48 кг), Саиджамшид Жафаров (54 кг), Темурбек Саъдуллаев (60 кг) ва Дилшодбек Рўзметовлар мусобақани ғалаба билан бошлашганди.