Европа Иттифоқи яқин орада Ўзбекистонда 168 млн евролик вилоятларни қўллаб-қувватлаш дастурини ишга туширади.

Европа Иттифоқининг Ўзбекистондаги элчиси Юрий Штеркнинг айтишича, бу дастур 2020 йилгача босқичма-босқич алоҳида блоклар билан амалга оширилади.

“20 млн долларлик биринчи блок сув захираларини бошқариш тизимини яхшилаш учун йўналтирилади. У расман келишилган”, деб айтди элчи.

Яқин орада дастурни бевосита амалга оширишни бошлаш ва бу дастурга мос келувчи вилоятларни аниқлашга имконият берувчи келишувларни имзолаш керак бўлади.

Штеркнинг айтишича, вилоятларда ўрта ва кичик бизнесни қўллаб-қувватлашга мўлжалланган кейинги сегментни тайёрлаш ишлари бошланган.

“Бир неча йил давомида йилига ўртача 20-25 млн еврони тасдиқлаб, ҳамкорликнинг аниқ шаклларини аниқлаштириб олишимиз керак бўлади. Бошқа йўналишлар касб-ҳунар таълими ва қишлоқ хўжалигининг экологик кўринишларини ривожлантиришни қамраб олади”, деб айтди Штерк.