Молия вазирлиги Ҳайъатининг давлат бюджетининг 2015 йил биринчи чорагидаги ижросига бағишланган йиғилиши бўлиб ўтди. Бу ҳақда вазирликнинг расмий сайти орқали ахборот берилди.

Ҳайъат йиғилишида давлат бюджетининг биринчи чоракдаги ижроси, бюджет ижроси жараёнида Ғазначилик бўлинмалари томонидан амалга оширилган ишлар ва жорий йилни муваффақиятли якунлаш учун амалга оширилиши зарур бўлган вазифалар ҳамда Молия вазирлиги ҳузуридаги Бюджетдан ташқари Пенсия жамғармаси ва унинг ҳудудий бошқармалари томонидан 2015 йил 1-чоракда амалга оширилган ишлар кўриб чиқилди.
Бундан ташқари, ҳисобот давридаги давлат бюджети даромадлари сонларда ифодалаб берилди. Келтирилишича, бюджетнинг даромадлари 7 638.7 млрд сўмга, харажатлари эса 7 615.6 млрд сўмга бажарилиши таъминланиб, у ялпи ички маҳсулотга нисбатан 0.1 фоиз миқдорида профитсит билан ижро этилган.

Қорақалпоғистон Республикаси бюджети, вилоятлар ва Тошкент шаҳар маҳаллий бюджетлари учун белгиланган даромад кўрсаткичлари (ўтказиб бериладиган даромадлар билан бирга) 3364.3 млрд сўмга ёки 100.8 фоизга бажарилди; жами харажатларининг қарийб 52.3 фоизи ёки 3 981.5 млрд сўми маҳаллий бюджетлардан молиялаштирилиб, Қорақалпоғистон Республикаси бюджети ва маҳаллий бюджетларнинг харажатлари 98.2 фоизга ижро этилди.

Шунингдек, республика бюджетидан Қорақалпоғистон Республикаси бюджети ва маҳаллий бюджетларга 567.7 млрд сўм мақсадли субвенциялар, 367.9 млрд сўм ўтказиб бериладиган даромадлар ажратилди.