Ўзбекистонда минтақаларни ахборотлаштириш бўйича синов лойиҳалари бошланади. Синов лойиҳалари Тошкент шаҳрининг Сирғали ва Тошкент вилоятининг Пскент туманларида амалга оширилиши тасдиқланди.

Ушбу ҳудудларда Ўзбекистон президентининг 2013 йил 26 мартидаги 2518-рақамли “2015 йилда ИКТ соҳасидаги ҳамкорлик бўйича Ўзбекистон-Корея қўшма лойиҳаси тўғрисида”ги қарори доирасида дастурлар ишга туширилади.
Корея ахборотлаштиришни тадқиқ этиш ва ривожлантириш институти делегацияси минтақавий органлар тайёргарлигини текшириш ҳамда маъмурий ишларни ахборотлаштириш бўйича бош режани ишлаб чиқиш мақсадида Тошкентга ташриф буюрди. Делегация режани муҳокама қилиш учун бир қатор учрашувлар ўтказди.

Учрашувлар давомида кореялик мутахассислар томонидан қуйидаги мавзудаги лойиҳалар тақдим қилинди:
1) Local Informatization Master Plan for Uzbekistan (Ўзбекистонни минтақавий ахборотлаштириш бўйича бош режа);
2) Understanding BPR and its applications (BPR ҳақида тушунча ва унинг қўшимчалари).
Корея делегацияси ҳокимият томонидан хизматлар кўрсатилиши жараёнини синчиклаб ўрганиш мақсадида Тошкент ҳокимиятида иш олиб бордилар. Бундан ташқари, улар Сирғали тумани ҳокимиятида учрашувлар ўтказди.