“Жамоатчилик назорати” гуруҳи иштирокчилари интернетда “Олий таълим муассасасига пора бермасдан кириш мумкинми?” деган мавзу бўйича баҳс-мунозара ташкил этишди.

Мавзу муаллифини турли ОТМларга кириш учун нархларнинг очиқчасига мууҳокама қилиниши ҳайратга солмоқда ва у “ОТМга ҳақиқатан ҳам пул бермасдан кириб бўлмайдими?” деган савол билан мурожаат қилмоқда.

“Яқинда барча абитуриентлар ва уларнинг яқинлари учун ОТМларга имтиҳон топшириш куни етиб келади. Мен ҳам ота бўлганим учун, кўпинча “Кимга қанча бериш керак?” деган саволни эшитаман. Наҳотки (ёки кўпчилик шундай ўйлайди) ОТМларга пора бермасдан кириб бўлмайди, деб ўйлашса? Бу иллатни йўқотиш учун жамоатчилик назоратининг қандай тиргакларини ишга солиш керак?”, деб юзланмоқда гуруҳ иштирокчиси Жаҳонгир Усманов.

Мавзу анча мунозараларга сабаб бўлди ва бу масала хусусида турли қарашларни тўплади. Ажабланарлиси, гуруҳ иштирокчиларининг аксарияти ОТМларга пора эвазига кириш ҳолатлари кўплиги, ўз кучи билан кирганлар эса кам учрашини таъкидламоқдалар. Бу вазиятга сабаблар кўплиги айтилмоқда.

Увасий Ҳикматова: “Афсуски, ҳозирда кўпчилик пул эвазига ўқишга кирмоқда. Мисол учун, менинг танишларимнинг қизи юридик коллежга 500 долларга ўқишга кирди. Бизда ҳаттоки юридик, дипломатия ва бошқа нуфузли коллежларга кириш учун ҳам пул тўлаш керак”.

“Мактабда ёки лицейда яхши ўқимаган болаларнинг ота-оналари пул берадилар. Менинг ўғлим яхши ўқиган ва ўз синфдошлари каби ўз кучи билан ўқишга кирди. 10 кишидан 9 нафари ҳеч қандай пул-мулсиз ўқишга кирди”, деб таъкидламоқда Елена Бережная.

Бурхон Султонов бу муаммони таълимдаги ҳали якунига етмаган ислоҳотларда кўрмоқда: “Бизнинг пайтда ўқитувчига очиқчасига пора бериш қийин иш эди. Улар пора олган бўлсалар-да, буни худди эртага партбилетлари тортиб олинадигандек алфозда олишарди. Ҳозирчи... барча хизматлар нархи шундоққина доскада ёзиб қўйилмоқда. Ҳамма муаммо шундаки, бизнинг таълим тизимиз хорижий намуналарни олишга уринаётган бўлсада, буни охиригача амалга оширмаяпти. Бунинг эвазига таълим тизими ҳали ҳам бир оёғи билан эски тизимда қолиб кетмоқда, бири эса хорижий тизимга кириб бормоқда ва қайси томонга ўтишни била олмасдан аросат ҳолда турилибди”.

Гуруҳ иштирокчилари ОТМларда порахўрлик иллатига барҳам бериш учун имтиҳон топшириладиган синфхоналарни камералар билан жиҳозлашни, порахўрлар учун қаттиқроқ жазо чораларини қўллашни, ўқитувчиларнинг маошини уларнинг пора олишга мажбур қилмайдиган даражада кўпайтиришни маслаҳат бермоқдалар. Шунингдек, имтиҳонларни камайтириб, мактабдаги умумий ўзлаштиришга таяниш, ёки камида мактабда “3” баҳога ўқиган ўқувчи имтиҳонларни аъло даражада топшира олмаслигига эътиборни қаратиш лозимлиги айтилмоқда.

UZ24 портали Олий ва ўрта махсус таълим вазирлигига ушбу ҳолат юзасидан расмий мурожаат йўллаган.