Американинг машҳур озиқ-овқат концерни PepsiCo Европа чемпионлар Лигасининг расмий ҳомийсига айланди. Бу ҳақда компания расмий сайтида хабар тарқатилган.

Шартномага кўра, компаниянинг Pepsi, Lay's, Gatorade, Lipton, 7 UP ва Doritos каби озиқ-овқат ва ичимлик маҳсулотлари Европа чемпионлар Лигаси бўлиб ўтаётган стадионлар четидаги реклама баннерларида ва шунингдек бошқа медиа кузатувлар жойлашган ҳудудларда пайдо бўлади.

«Бугун PepsiCo катта футболда янги даражага чиқди. Шубҳасиз, Европа чемпионлар Лигаси жуда улкан, оммабоп турнир. Ундаги ҳар бир учрашувни бир миллиарддан ошиқ одам томоша қилади. Янги ҳамкорлик иккала томон учун ҳам мисли кўрилмаган имкониятларни очади», дея гапириб ўтди компаниянинг Европа бўлими ижрочи директори Рамон Лагварта.

Томонлар уч йиллик шартнома тузишган. Шартноманинг молиявий шартлари ошкор этилмаган.

Маълумот ўрнида таъкидлаб ўтиш жоиз, PepsiCo озиқ-овқат концерни 22 турдаги бренд маҳсулотларини дунёнинг 200дан ортиқ мамлакатларидаги истеъмолчиларга сотиб келмоқда. 2014 PepsiCo йиллик сотув ҳажми 66 миллиард АҚШ долларидан ошиб кетганди.