Яқин йилларда Ўзбекистонда контейнер терминаллари миқдори 30 тагача етказилади, юк айланмаси тизимида контейнер орқали ташишлар 20 фоизга яқинни ташкил этади.

Бугунги кунда Ўзбекистонда контейнер орқали ташишлар 7 фоизни ташкил қилмоқда. 2020 йилда бу рақам 20 фоизга етказилиши режалаштирилмоқда. Йилига 500 та турли модификациядаги контейнер ишлаб чиқарилиши режалаштирилган.

Тошкентда бўлиб ўтган, Халқаро бизнес ва технологиялар уюшмаси (AMBIT) ва Бизнес-логистикани ривожлантириш уюшмаси Латвия алоқа вазирлиги ва Латвиянинг Ўзбекистондаги элчихонаси кўмагида ташкил этган “Ўзбекистон-Латвия-ЕИ давлатлари транспорт коридори” деб номланган халқаро анжуманда айтилганидек, 2011-2015 йилларда Ўзбекистон транспорт соҳасига 7 млрд доллар киритилган. Соҳа ривожланишининг зарурий суръатларини қўллаб-қувватлаш учун Ўзбекистонда транспорт секторига инвестициялар 2030 йилгача 47 млрд долларни ташкил қилиши керак.

Иқтисодий тадқиқотлар маркази экспертларининг баҳолашича, Ўзбекистон иқтисодиётининг ўрта муддатли истиқболда 8 фоизлик ўсишини ушлаб туриш учун юк ташишлар ҳажми йилига ўртача 9,2 фоиз ошиб бориши керак.