“Ўзметкомбинат” акциядорлик жамияти базальт толаси ишлаб чиқаришни йўлга қўйди. Review.uz порталининг корхона инвестициялар департаменти раҳбари Наримон Умаровга таянган ҳолда маълумот беришича, комбинат янги технологиялар асосида минг тонна маҳсулот ишлаб чиқаришга улгурган.
Корхона йилига базальт асосидаги 10 минг тонна ёки 120 минг кубометр иссиқлик ушловчи материаллар ишлаб чиқаришга мўлжалланган. Маҳсулот қурилиш саноати корхоналари, кимё, нефть-газ ва электр энергияси соҳаларида кенг қўлланади.
Айтилишича, бу янги уй-жой қурилишида иссиқлик ушловчи материалларнинг қўлланиши энергия йўқотилишини 50 фоизга камайтиришга ёрдам беради.
Хом ашё базаси сифатида Жиззах вилоятидаги Осмонсой кони ишлатилмоқда. У ердан олинаётган базальтлар Грузия ва Украинада чиқадиган маҳсулотлардан сифат жиҳатдан қолишмайди.