Буюк Британиянинг маданият, ОАВ ва спорт ишлари бўйича янги бош котиби Жон Уиттингдэйл Буюк Британия парламентининг қуйи палатаси йиғилишидаги нутқи давомида агар Қатар 2022 йилги жаҳон чемпионатини ўтказиш ҳуқуқидан маҳрум этилса, ушбу чемпионатни Англия ўтказишга тайёрлигини маълум қилди. Бу ҳақда BBC телеканали хабар бермоқда. 

Айни пайтда Швейцария бош прокуратураси 2018 ва 2022 йиллардаги жаҳон чемпионати мезбонларини танлашда қоидабузарликларга йўл қўйилгани ҳолатини тергов қилмоқда. Англия 2018 йилги жаҳон чемпионатини ўтказиш учун даъвогарлик қилган эди, бироқ бу ҳуқуқни Россияга бой берган. Аввалроқ Англия Футбол уюшмаси ижрочи директори Мартин Гленн Англия 2018 ва 2022 йиллардаги жаҳон чемпионатларини ўтказишга даъвогарлик қилиш ниятида эмаслигини маълум қилганди.

ФИФА аудити жаҳон чемпионати мезбонларини танлаш сайловларида қоидабузарлик ҳолатини аниқламади.

2022 йилги жаҳон чемпионати Қатарда ёзги пайт жуда иссиқ келиши сабабли илк бор тарихда июнь-июль ойларида эмас, балки ноябрь-декабрда ўтказилиши белгиланган эди.