Халқаро жиноий қидирув ташкилоти (Интерпол) ФИФА билан ҳамкорлик қилишни тўхтатди. Бунга ФИФА тизимида охирги вақтларда аниқланган порахўрлик билан боғлиқ можаролар сабаб бўлган. Бу ҳақда ташкилотнинг расмий сайтида маълум қилинди.

"ФИФА билан келишувда иккинчи томоннинг фаолияти Интерполнинг мақсадларига зид бўлмаслиги кераклиги ҳақида банд бор эди. ФИФА тизимидаги амалдорларнинг порахўрликда гумон қилиниб, қўлга олиниши бу келишувга риоя қилинмаганини кўрсатади", дейилади ташкилот томонидан.

Эслатиб ўтамиз, 27 май куни АҚШ бош прокурори Лоретта Линч ФИФА коррупция можаросидаги олти айбланувчи 24 йил ичида жами 150 миллион доллар пора олганини маълум қилган эди. Ўша куни Цюрихда ФИФАнинг қатор амалдорлари қўлга олинган бўлиб, ҳозирда АҚШга экстрадициясини кутмоқда. Бу можаролардан кейин Йозеф Блаттер бешинчи муддатда президентлигини давом эттирмаслигини маълум қилган.

Ташкилот раҳбарлиги учун муддатидан олдин сайловлар шу йилнинг 16 декабрида ўтказилади.