Қозоғистонликлар президент Нурсултон Назарбоев номига петиция тайёрлаб, унда мактабларда бепул овқатланишни тиклашни илтимос қилишди.

“Ҳукуматнинг республикадаги миллионлаган ўқувчиларни бепул овқатланишдан маҳрум қилиш ҳақидаги қарори фуқароларнинг норозилигига сабаб бўлмоқда. Давлат бюджети маблағларини ёш авлод манфаатлари ҳисобидан тежашга бўлган ҳаракат сиёсий жиҳатдан узоқни кўзламаган ҳамда тарбиявий, ижтимоий-иқтисодий самараси юқори бўлмаган серҳаражат тадбирлар ўтказилаётган пайтда жуда ақлсиз қарор бўлиб кўринмоқда. Айниқса бундай қарорнинг муқаддас Рамазон ойи арафасида эълон қилиниши адолатдан бўлмади. Сиздан ҳукумат томонидан йўл қўйилган бу ачинарли хатони тузатишингизни ва шошилинч қабул қилинган ушбу қарорни бекор қилишингизни илтимос қиламиз. У фақатгина миллионлаб оилаларнинг бюджетига эмас, балки ҳукуматнинг мавқеига ҳам зарар келтиради”, – дейилади петиция матнида.
Эслатиб ўтамиз, 1 сентябрдан Қозоғистонда кичик синфлар мактаблари ўқувчилари учун ташкил этилган бепул овқатланиш бекор қилинди. Илгари овқатларнинг сифати устидан кўп бора шикоят қилинган эди. Шунингдек, ижарачилар ижара нархининг 900 фоизга ошганидан ўз норозиликларини билдирган эди.