11 июнда Франция-Ўзбекистон бизнес форуми давомида «Тошшаҳартрансхизмат» АК вакили компаниянинг лойиҳаларини тақдимот қилиш пайтидаги нутқи давомида компанияда нақд пулларни яшириш ҳолатлари рўй беришини таъкидлаб ўтди.

“Ҳеч кимга сир эмас, нақд пулларни яширишнинг субъектив сабаблари мавжуд. Шунинг учун бизда жамоатчилик транспортида контактсиз тўловни амалга ошириш тизимини жорий қилиш бўйича ишлар олиб борилмоқда. Компания вакиллари жорий йилда Францияга ташриф буюриб, бу борадаги маҳаллий тажриба билан танишишди”, деб айтди компания вакили.

Вакил бундай тизимнинг Тошкентда татбиқ қилинишининг охирги муддати 2016 йил бўлиши, бироқ барча ишлар шу йилиёқ якунига етказилиши мумкинлигини айтди.

Смарт-карталар тизимини жорий қилиш учун техник томондан 3-4 ой талаб этилади. Бу ҳақда шу йилнинг бошида “Тошшаҳартрансхизмат” АК бошқарув раиси Отабек Содиқов маълум қилган эди.

Содиқов бу тизимнинг асосий афзалликлари орасида дифференциялашган тўлов ва тўланган сафарлар таҳлилидан келиб чиқиб йўналиш тармоғини янада оптималлаштириш имкониятини айтди.