БАА ҳукумати мусулмонлар учун муқаддас бўлган Рамазон ойи пайтида озиқ-овқат маҳсулотлари учун нархларни музлатиб қўяди, деб хабар бермоқда БААнинг The National нашри.

Нарх-навони оширишга тақиқлов ўз ичига 3500 турдаги маҳсулотни қамраб олади. БАА иқтисодиёт вазирлиги гуруч, ун, ёғ, сут ва бошқа маҳсулотлар етказиб берувчилари билан улар Рамазон ойида талаб ошадиган бу маҳсулотларга етарлича даражада эга эканликларига ишонч ҳосил қилиш учун учрашувлар ўтказди.

Савдо нуқталарида нархлар текшириб борилади. Бундан ташқари, биринчи навбатдаги 4700 маҳсулотга 70 фоизга чегирмалар жорий қилинади.

БААда ислом динида муқаддас ҳисобланган Рамазон ойида анъанавий тарзда йирик хайрия лойиҳалари, жумладан, бепул саҳарлик ва ифторликлар, хайр-эҳсонлар йиғиш ва асосий истеъмолчилик маҳсулотларига нархларнинг туширилиши ташкил этилади.