12 июнь куни Туркманистон президенти Гурбангули Бердимуҳаммедов Боку шаҳрида Туркия президенти Ражаб Тоййиб Эрдўған билан учрашув ўтказди ва яқин вақт ичида Туркия, Туркманистон ҳамда Озарбойжон давлатлари раҳбарлари иштирокида учрашув ўтказишни таклиф қилди.

У Боку шаҳрига 2015 йилги Европа ўйинларининг очилиш маросимида қатнашиш учун борган ва Озарбойжон президенти Илҳом Алиев билан ҳам учрашган.

"Учрашув давомида томонлар ўзаро ҳамкорликнинг яқин келажакдаги истиқболлари тўғрисида гаплашишди. Хусусан, қулай географик жойлашувдан фойдаланган ҳолда замонавий транспорт тузилмасини яратиш ва Европага Каспий минтақасидан табиий газ етказиб беришни йўлга қўйиш масалалари муҳокам қилинди", дейилади Озарбойжон президентининг матбуот хизматида.