2014 йилда Россия алоқа операторлари мобиль мессенжер ҳамда VoIP-сервисларнинг оммалашуви сабабли 15-20 млрд рубль даромаддан маҳрум бўлишди.

Россияда катта фарқ билан Skype пешқадамлик қилмоқда. Ундан 70 фоиз абонентлар фойдаланади. Кейинги ўринларни Mail.ru Group ("Mail.ru Агент", "Одноклассники", ICQ ва "ВКонтакте"), WhatsApp, шунингдек, QIP, Facebook ҳамда Viber мессенжерлари эгаллаган.

J'son & Partners Consulting компанияси таҳлилчиси Виталий Солониннинг таъкидлашича, Россиядаги ҳолат тез-тез ўзгариб туради.

“WhatsApp ва Viber аллақачон Skype билан тенгма-тенг рақобат қилмоқда. Ҳаттоки, баъзи йирик шаҳарларда ундан ўзиб кетган”, - дейди мутахассис.

Бу каби сервисларнинг ривожланиши Россия алоқа операторларининг даромадларига салбий таъсир кўрсатмоқда. Бундан ҳимояланишнинг ягона усули ушбу сервисларни блоклаш ҳисобланади. Бироқ ҳеч бир оператор бундай чораларни амалга оширишга киришмаган.