Россия президенти Владимир Путин Озарбойжон пойтахти Боку шаҳрига ташрифи давомида Туркия президенти Ражаб Тоййиб Эрдўған билан музокара ўтказди. Бу ҳақда РИА Новости хабар қилган.

Қайд этилишича, учрашув ёпиқ режимда ўтказилган.

Ушбу учрашувдан кейинги чиқишида Путин Бокудаги Европа ўйинларининг очилиш маросимида Европа Кенгашининг давлатлари раҳбарлари қатнашмаганини танқид қилган.

У шунингдек, Туркия Европа Иттифоқи аъзо бўлиш учун муносиб номзодлигини таъкидлаган.

Маълумот учун, Бокудаги Олимпийский ўйингоҳида ўтказилган очилиш маросимида Россия ва Туркия раҳбарларидан ташқари Халқаро Олимпия Қўмитаси раҳбари Томас Бах, Монако князи Албер Иккинчи, Беларусь президенти Александр Лукашенко каби мартабали меҳмонлар иштирок этишди.

Шунингдек, маросимда Россия томонидан президент ёрдамчиси Юрий Ушаков, Ташқи ишлар вазири Сергей Лавров, Энергетика вазири Александр Новак, Росатом бошлиғи Сергей Кириенко ҳамда "Газпром" раҳбари Алексей Миллер қатнашган.