Ўзбекистон вакиллари Россиядаги олий ўқув юртларида таҳсил оладиган МДҲ давлатларидан келган талабалар орасида энг кўп миқдорни ташкил этади. Бу ҳақда Россия Федерациясининг Ўзбекистондаги элчиси Владимир Тюрденев маълум қилган.

"Россия ва Ўзбекистон ўртасидаги изчил алоқалардан бири таълим соҳасида кузатилади. Россия Федерацияси Фан ва таълим вазирлиги ҳамда Ўзбекистон Республикаси Олий ва ўрта махсус таълим вазирлиги ўртасида 2005 йилнинг 12 августидан махсус ҳамкорлик йўлга қўйилган.

Ўтган давр мобайнида Ўзбекистонда Россиянинг бир қатор Олий ўқув юртларининг филиаллари ташкил этилди, Ломоносов номидаги Москва давлат университети, Плеханов номидаги иқтисодий академия, Губкин номидаги Россия нефть ва газ давлат университети шулар жумласидан.

Ҳар йили Россиядаги олий таълим даргоҳларида хорижликлар учун квоталар ажратилади ва МДҲ давлатлари орасида бу ўринларнинг энг кўп қисмини Ўзбекистон фуқаролари эгаллашади. 2014 йили Ўзбекистон мактаб ва коллежларининг 1080дан ортиқ битирувчилари Россия олий таълим муассасаларига ўқишга қабул қилинди, уларнинг 305 нафари Россия ҳукумати томонидан, хусусан, Ўзбекистон фуқаролари учун ажратилган таълим квотаси асосида ўқишга кирган", деб қайд этади Россия элчиси.