12 июнь куни Тошкентдаги "Ўзбекистон" спорт саройида ёшлар ўртасида ўтказилаётган Осиё чемпионатида ярим финал жанглари бўлиб ўтди

Мазкур ярим финал баҳсларининг барча вазн тоифаларида ўзбекистонлик чарм қўлқоп усталари рингга кўтарилди ва ғалаба қозониб, финалга йўл олишди.

Халимбек Утегенов (-46 кг) афғонистонлик Масвер Какатни, Жаҳонгир Раҳмонов (-50 кг) Япония вакили Мацумото Кейсукени, Саиджамшид Жафаров (-54 кг) таиландлик Анан Тхонкратхокни, Темурбек Саъдуллаев (-60 кг) филиппинлик Чавес Роналдни, Дилшодбек Рўзметов (-66 кг) Ж.Корея вакили Сеунгмин Анни, Қосимхон Қосимов (-75 кг) қозоғистонлик Табинбаевни ва ниҳоят Профсор Роримша қозоғистонлик Нурдаулет Уланулини енгиб, Осиё чемпионатининг олтин медаллари учун курашни давом эттирадиган бўлди. 

Куннинг иккинчи ярмида эса 70 килограмм вазн тоифасида беллашган Яҳёхон Саидхонов қозоғистонлик Даулет Заушеавни 2:1 ҳисобида мағлубиятга учратди. Вазни 80 килограмм боксчилар баҳсида Жанубий Корея вакили Таекмин Кимга қарши жангга тушган Аббосхон Мирзаабдуллаев рақибига қатор зарбалар йўллаб, унга имконият қолдирмади ва якунда ғалаба қозониб, чемпионлик учун курашни давом эттирадиган бўлди. Шунингдек, 48 кг вазн тоифасида Баҳодир Баратов афғонистонлик Заҳор Нежрабини, 52 кг вазн тоифасида Муроджон Алиев Таиланд вакили Мастер Ванглаклангни, 57 кг вазн тоифасида Билолбек Мирзараҳимов Ҳусайн Моуза Ханини (Эрон) 63 кг вазн тоифасида Тимур Мержанов Аибол Замбирбайни (Қозоғистон) мағлуб этишди ва финалда олтин медаллар учун рингга кўтариладиган бўлишди.