Туркманистон БМТнинг Осиёда қуролсизлантириш бўйича минтақавий марказини ташкил этишни таклиф қилди. Бу масала 13 июнь куни Туркманистон президенти Қурбонўғли Бердимухамедов ва БМТ Бош котиби Пан Ги Мун ўртасидаги музокаралар давомида кўтарилди.
Музокаралар якунларига бағишланган матбуот анжуманида Туркманистон президенти учрашув давомида Афғонистондаги вазиятни тартибга солиш масаласига алоҳида эътибор қаратилганини маълум қилди. Шу муносабат билан Туркманистон афғон муаммосини фақатгина тинчлик йўли, сиёсий-дипломатик усуллар билан ҳал қилишга интилишидан иборат бўлган бу борадаги позицияси маълум қилинди.
Шунингдек, қуроллар тарқатилмаслиги ва қуролсизлантириш жараёнларини мустаҳкамлаш каби долзарб масалаларни ҳал қилишда ҳамда тегишли халқаро-ҳуқуқ базасини кенгайтиришга қаратилган чора-тадбирларни муҳокама қилишда биргаликдаги ҳаракатларнинг муҳимлиги таъкидлаб ўтилди.
Туркманистон президенти бу ҳақда гапира туриб, Марказий Осиёда ядровий қуролдан эркин ҳудуд ташқил этиш ҳақидаги келишувни амалга оширилиши муҳим аҳамиятга эгалигини таъкидлаб ўтди.
БМТ Бош котиби Ашхободдаги БМТнинг Марказий Осиё учун превентив дипломатия бўйича минтақавий марказининг сермаҳсул ишига юқори баҳо берди. Пан Ги Мун Қурбонўғли Бердимуҳамедовга Афғонистон ва Непалга кўрсатилган ёрдам ва афғон қочқинларини қўллаб-қувватлашдаги саъй-ҳаракатлари учун миннатдорчилик билдирди.
Туркманистон президенти юқори лавозимли меҳмон шарафига расмий кечки овқат маросимини ташкил қилди.