13 июнь куни Буюк Британия қироличаси Елизавета ІІ ўзининг 88 йиллик таваллуд аёмини расман нишонлади.
Британия қироллик оиласи Қиролича таваллуд кунининг расмий нишонланиши муносабати билан парадда иштирок этди.
Ҳар йили Байроқни олиб чиқиш байрамида қироллик гвардияси, суворилар ва артиллерия Сент-Жеймс саройи ёнидаги Кавалергард плацида парад уюштиради.


Қироллик оиласи вакиллари – малика Кейт, шаҳзода Гарри ва малика Камилла бир от аравага, қиролича эса турмуш ўртоғи билан бошқа от аравада майдонга кириб келишди. Шазҳода Уильям, унинг отаси шаҳзода Чарльз ва малика Анна парадда қироллик полковниклари сифатида отларда ўтириб иштирок этишди.
Қироличанинг очиқ файтонда чиқишини минглаб одамлар томоша қилишди. Парад якунлангандан кейин қироллик оиласи Букингем саройига қайтди ва бу ердаги болхонадан Буюк Британия Қироллик Ҳарбий-ҳаво кучлари самолётларининг тантанали парвоз қилишиларини томоша қилди.
Аслида қироличанинг ҳақиқий туғилган куни 21 апрелда нишонланади. Қадимий инглиз одатига кўра, қиролича ўзининг туғилган кунини бир йилда икки маротаба нишонлайди. Биринчиси бу Елизаветанинг асл туғилган куни бўлиб, у бу тантанани Виндзор саройида оила даврасида нишонлайди. Қироличанинг иккинчи туғилган куни эса ёзнинг биринчи шанбаларидан бирида нишонланади ва бу гал бу аём 13 июнга тўғри келди.