Хитойнинг жануби-шарқий Чжэцзян провинциясида яшовчи қария тўсин олиб кетаётган юк машинаси билан тўқнашувда тирик қолди, бироқ сал ўтмай ундан тушиб кетган тўсинлар остида қолиб ҳалок бўлди, деб хабар бермоқда Sina портали.

Порталнинг маълумотларига кўра, Цзиньхуа шаҳрида юк машинаси катта тезликда светофорнинг тақиқловчи чироғига эътибор бермай чорраҳага чиқиб кетиб, кекса одам ҳайдаб кетаётган скутерни туртиб юборган. Зарбадан кекса ҳайдовчи скутери ўриндиғидан отилиб чиқиб кетган ва ҳеч қандай жароҳат олмаган. Бироқ юк машинаси тўнкарилиб, ундаги тўсинлар йўлнинг қатнов қисмига тўкилиб кетган ва қария ўрнидан тураётган пайтда уни босиб қолган.

Яқин атрофдаги одамларнинг қариянинг ҳаётини сақлаб қолишга уринишлари зое кетди: улар қарияни тўсинлар уюми остидан 2 соатдан кейин топишди.

Айни пайтда полиция воқеа тафсилотларини аниқлаштирмоқда. Юк машинаси ҳайдовчисининг айтишича, у тўқнашувдан бироз олдин машина бошқарувини йўқотган.