14 июнь кунининг иккинчи ярмида Украина президенти маъмурияти биноси олдида Пётр Порошенконинг кортежи келадиган дарвоза ёнида Давлат қўриқлаш бошқармаси патрули томонидан портловчи қурилма аниқланди.

Порошенкони суиқасддан бахтли тасодиф сақлаб қолгани айтилмоқда.

“Соат 0:20 да Давлат қўриқлаш бошқармаси патрули (1-рақамли объект – президент маъмурияти биносини қўриқлаш учун жавоб беради) периметрни айланаётган пайтда патрулни кўриб, қочиб кетган бир кишини пайқаб қолди. Номаълум шахс қочиб кетган жой текширилганда президент кортежи келадиган президент маъмуриятидан чиқаверишлардан бирида портловчи қурилма қўйилгани аниқланди”, деб хабар бермоқда Украина миллий ахборот агентлиги.

Портловчи қурилма 5 та Ф-1 гранатаси ва масофадан бошқарилувчи граната, детонатор ва мобиль телефондан иборатлиги аниқланди.

“Портловчи қурилма гайкалар билан тўлдирилган бўлган. Жиноятчи қурилмани жанговор ҳолатга келтиришга улгурмаган. Шунингдек, шу жойдаги панжарага “Урушни бас қилмасанг, уруш сенинг ёнингга келади” деган ёзув илиб кетилган”, деб қўшимча қилинмоқда.

Донбассда ҳар куни ўнлаб украиналик ҳарбийлар ва тинч аҳоли ҳалок бўлмоқда. Порошенконинг сиёсатидан норози бўлаётганлар сони борган сари кўпаймоқда. Шунингдек, президентнинг “ички душманлари” ҳам талайгина ҳисобланади.