Украинанинг Одесса вилояти губернатори Михаил Саакашвили Одесса вилояти стратегик сессиясининг очилишидаги нутқида янги патруль хизмати яратилиши ҳақида маълум қилди, деб ёзмоқда УНИАН агентлиги.

“Одессада август ўртасидан янги патруль полицияси ишлашни бошлайди. 16 июнда Ички ишлар бошқармасининг янги раҳбари таништирилади”, деб айтди Саакашвили.

Саакашвилининг айтишича, айни пайтда маҳаллий милициянинг бир қисм ходимлари рейдерлик босқинларида иштирок этмоқда ва гиёҳвандфурушлик билан шуғулланмоқда.

“Ёзнинг охирида бундайлар қолмайди. Бу ерда ақлий қобилияти, муомаласи ва ишининг сифати билан тубдан фарқ қилувчи янги патруль полицияси пайдо бўлади”, деб қўшимча қилиб ўтди Саакашвили.

Аввалроқ Канада Украинанинг янги патруль полициясининг ўқув машғулотларини молиялаштиришга 5 млн доллар ажратишни режалаштираётгани маълум қилинганди.