Франциялик Робер Маршан 100 ёшдан катталар орасида велосипедда тез юриш бўйича ўзининг рекордини янгилади. Бу ҳақда United Press International нашри хабар бермоқда. 

Қайд этилишича, янги рекорд Париж яқинидаги шаҳарчада ўрнатилди. 102 ёшли велопойгачи бир соат ичида 27 км босиб ўтишга муваффақ бўлди. Спортчини қўллаб-қувватлаш учун 300 нафарга яқин одам келди. Маршаннинг айтишича, пойга давомида у ўзини яхши ҳис қилди, бироқ йўл охирида чарчашни бошлаган. Спортчи ўзининг бу натижасидан кўнгли тўлмаганини қайд этган.

Маршан велоспорт билан проффесионал даражада шуғулланувчи 100 ёшдан катта бўлган ягона инсон ҳисобланади. Унинг бу борадаги олдинги рекорди 2012 йилда қайд этилган эди: у бир соат ичида 24,25 км босиб ўтганди.

Бундан ташқари, у велосипедда 100 км босиб ўта олган 100 ёшдан катта ягона инсон ҳисобланади. Бу масофани босиб ўтиш учун унга 4 соат 17 дақиқа талаб этилган.

Робер Маршан 1911 йилнинг 26 ноябрида дунёга келган. У болалигидан профессионал велосипедчи бўлишни истаган, бироқ катта спорт унга насиб қилмаган. У ёғоч кесувчи ва ҳайдовчи бўлиб ишлаган ва ҳаваскорлик даражасидаги мусобақаларда иштирок этиб юрган. Маршан велосипед спорти билан профессионал даражада пенсияга чиққандан кейин шуғулланишни бошлаган.