1962 йили ДНКнинг қўш спиралини кашф қилган америкалик биолог Жеймс Уотсон эртага Россия Фанлар Академияси катта залида очиқ маъруза ўтказади. Академияга ташриф давомида ким ошди савдоси чоғида Уотсонга USM Holdings компанияси асосчиси, россиялик тижоратчи Алишер Усмонов томонидан сотиб олинган Нобель медалини қайтариш маросими бўлиб ўтади.

Фанлар Академияси матбуот хизматининг маълум қилишича, маросимда илмий муассаса президенти Владимир Фортов иштирок этади.
2014 йили Уотсон ўзига тегишли медални сотиб, пулларнинг бир қисмини илмий муассасаларга тарқатишга қарор қилди. Ўша йилнинг декабрида Christie's ким ошди савдо уйида медаль 4.8 млн долларга Алишер Усмонов томонидан харид қилинди. Ўша пайтнинг ўзидаёқ Усмонов медални эгасига қайтариш мақсадида сотиб олганини айтиб ўтди.

“Кўзга кўринган олим ўз муваффақиятлари белгиси ўлароқ олган медалнинг сотилиши чидаб бўлмас ҳолатдир. Жеймс Уотсон инсоният тарихидаги энг буюк биологлардан биридир, ва унинг ДНК структурасини кашф қилгани учун олган мукофоти ўзида қолиши керак”, – деганди ўшанда Алишер Усмонов.
1962 йили Уотсон ҳамкасблари Фрэнсис Крик ва Морис Уилкинслар билан биргаликда физиология ва тиббиёт бўйича Нобель мукофоти совриндори бўлган эди. Улар мукофотни ДНК структурасини очганлари учун олган эдилар.

Охирги йилларда Уотсон ўсимта касалликларига қарши самарадор методлар қидириш билан банд. Унинг фикрича, фан бугунги кунда ушбу оҳир хасталикни енгиб ўтишга қодир.