Британиялик юрист Мэттью Дик газетада чоп этиладиган кроссвордда маъшуқасига турмушга чиқиш таклифини билдирди. Бу ҳақда The Associated Press ахборот агентлиги хабар бермоқда. Дик ўзининг маъшуқаси Делит Хьюзга шифрланган хабар ўйлаб топиб, нашрни уни чоп этишга кўндирди.

Хьюз учун тайёрланган саволларга эга кроссворд нашрнинг 16 июндаги сонида чоп этилди. Дикнинг айтишича, у ушбу кроссворднинг баъзи сўзлари белгиланган ҳолдаги газетани нонушта пайтида маъшуқасига кўрсатган. Сўнгра юрист севгилисига узук тақдим қилди.

“У жуда ҳайратланди ва 30 сонияча ҳеч нарса демади, сўнгра ҳазиллашиб “йўқ” деди. Бироқ кетидан “ҳа” деб ўз розилигини берди”, деб айтмоқда Дик. Ўз навбатида Хьюз ҳам ҳайратдалигини айтиб, “Мен унаштиришлар ҳақида кўплаб воқеаларни эшитганман, бироқ буниси энг ҳайратланарлиси бўлди”, деди.

The Times кроссвордлар муҳаррири Ричард Роганнинг айтишича, нашр биринчи марта турмушга чиқиш таклифини чоп этмоқда. Роган бу ҳолат бир марта содир бўлгани ва бундай ҳоллар бошқа такрорланмаслигини қўшимча қилиб қўйди.