Ўзбекистон чегара хизмати Афғонистон ҳудудида жойлашган террорчи гуруҳларнинг ҳар қандай ҳужумларини қайтаришга тайёр. Бу ҳақда Душанбеда бўлиб ўтган МДҲга аъзо давлатлар чегара қўшинлари командирлари кенгашининг 73-йиғилиши натижаларига кўра ташкил этилган матбуот анжуманида Ўзбекистон МХХ чегара қўшинлари штаби бошлиғи Носирбек Усмонбеков маълумот берди.

Унинг сўзларига қараганда, Ўзбекистон-Афғонистон чегараси яқинида бир гуруҳ жангариларнинг тўплангани қайд этилган, аммо уларнинг сони Тожикистон-Афғонистон чегарасидаги жангарилар сонидан анча кам.
Тожикистон чегара қўшинлари командири, миллий хавфсизлик давлат қўмитаси раисининг биринчи ўринбосари Ражабали Раҳмонали берган маълумотларга қараганда, Тожикистон-Афғонистон чегараси яқинида айни кунларда 1.5 мингдан ортиқ жангари тўпланган. Улар орасида ИШИД аъзолари ҳам мавжудлиги айтилмоқда.