Ҳиндистонда қалбаки спиртли ичимлик истеъмол қилишдан заҳарланиш қурбонлари 83 нафарга етди. Охирги суткада 60 га яқин қиши ҳалок бўлди, деб хабар бермоқда NDTV телеканали.
Кўнгилсиз воқеа Мумбай яқинидаги қишлоқлардан бирида содир бўлди.
17 июнга ўтар кечаси маҳаллий аҳоли спиртли ичимликлар сотиладиган дўкондан ушбу қалбаки ичимликни сотиб олганлар. Эртаси куни, 18 июнда улар қорин соҳасидаги кучли оғриқ ва кўнгил айнаш шикояти билан шифохонага етказилганлар. Дастлабки куни 20 киши ҳалок бўлган.
Қолган жабрланувчилар оғир аҳволда қолмоқда, шифокорлар уларнинг ҳаётлари учун курашмоқдалар. Сифатсиз спиртли ичимликни қанча одам истеъмол қилганини аниқлашнинг имкони бўлмаган. Айни дамда шифохоналарга ҳанузгача заҳарланишга учраган беморлар келтирилмоқда.
Полиция ушбу воқеа юзасидан 3 кишини ҳибсга олди. Уларга атайлаб қилинмаган қотиллик ва ноқонуний савдо-сотиқ бўйича айбловлар қўйилди. Бу воқеа Мумбайда сифатсиз спиртли ичимлик истеъмол қилиш оқибатида бундай катта миқдорда заҳарланиш рўй бераётган биринчи ҳодиса эмас. 2004 йилда сифатсиз спиртли ичимлик истеъмол қилиш оқибатида 89 киши ҳалок бўлган.