Россиянинг Кострома шаҳри Димитров туман суди костромалик 29 ёшли аёлга унинг ўлимига олиб келган оғир тан жароҳатлари етказганликда айбланган 28 ёшли Ўзбекистон фуқаросига жазо ҳукмини чиқарди.

Жиноий иш материалларидан маълум бўлишича, ўзбекистонлик ёш эркак Кострома вилоятига ишлагани келиб, бу ерда маҳаллий аёл билан танишиб, у билан бирга яшай бошлаган. Эркакнинг Ўзбекистонда рафиқаси ва икки фарзанди бўлган.

Бир ўзи икки қизини тарбиялаётган костромалик аёл эркакни бажонидил қабул қилган ва унга вақтинчалик рўйхатдан ўтишига кўмак берган. Тез орада аёл ўзбекистонликдан учинчи фарзандини туққан.

Эркак аёл билан фақатгина бирга яшаган бўлсада, гоҳида ўзини уйнинг эгасидек тутиб, ҳақ-ҳуқуқини талаб қилиб туришдан ҳам тоймаган. Тергов маълумотларига кўра, 2014 йилнинг 7 ноябрь куни аёл кўчада ўз дугонасини кўриб қолиб, уйига меҳмонга таклиф қилган. Аёллар ошхонада ўтириб, вино истеъмол қилишган. Шу пайт унинг ҳамхонаси ишдан қайтиб келган ва аёлларнинг ичиб ўтирганини кўриб жаҳли чиққан. Аёлнинг дугонасини ҳайдаб чиқарган ва ўз фарзандининг онасига ташланиб, унинг юзига тарсаки урган, жаҳл устида итариб юборганда аёл боши билан эшик четига урилган. Бу барча воқеа аёлнинг болалари кўз ўнгида содир бўлган.

Жанжал тунга яқин тинчиган. Аёл боши қаттиқ оғриётганидан шикоят қилиб ухлашга ётган, эркак эса бунга аҳамият бермаган. Аёл эртаси куни эмизикли фарзандини эмизаётганда ўлиб қолган. Аёлнинг ўлимига ёпиқ ҳолдаги бош мия-чаноқ жароҳати сабаб бўлган.

Суд ўзбекистонлик мухожирни 8 йилга озодликдан маҳрум этди.