АҚШнинг Аризона штатида фалокатга учраган F-16 қирувчи самолётини Ироқ армияси генерали Рафид Муҳаммад Ҳасан бошқаргани маълум бўлди, деб хабар бермоқда Arizona Daily Sun нашри. 

Учувчининг шахси ҳақида Ироқ Мудофаа вазирлиги вакили Таҳсин Иброҳим хабар берди.
“Бизга ҳанузгача унинг тақдири, фалокат сабаблари ҳақида ҳеч нарса маълум эмас. Биз америкалик ҳамкасбларимиз билан алоқада бўлиб турибмиз ва воқеа тавсилотлари ҳақидаги маълумотларни кутмоқдамиз”, деб айтди Ироқ вакили.

Ҳасан 4 йил давомида АҚШда яшаб, вақти-вақти билан замонавий ҳарбий самолётларда машғулот парвозлари амалга ошириб турган.

Самолёт қулаган жойда қутқарув операцияси олиб борилмоқда, бироқ операция Дуглас шаҳри яқинида қулаган самолёт газ қувурини шикастлагани оқибатида чиққан ёнғин сабабли ўтказилиши қийин кечмоқда.