Хигасияма ҳайвонот боғида сақланувчи Шабани лақабли хушқомат эркак горилла япониялик аёлларни ўзига ром этмоқда. 18 ёшли маймуннинг фотосурати твиттерда оммалашиб кетди.

Ҳайвонот боғи ходимларининг айтишича, ҳайвонот боғига хушбичим Шабанини томоша қилгани ёш аёллар тўп-тўп бўлиб ташриф буюрмоқдалар. Маймун сақланадиган қафас олдида доимо юзлаб томошабинлар бўлади. Маймун ҳар гал кўриниш берганда улар “Менга қара, Шабани!”, “Бу ёққа кел, Шабани!” деб ҳайқиришни бошлайдилар.

Бироқ Шабани аллақачон бўйдоқлик билан хайрлашиб бўлган, чунки унинг иккита хотини бор. Қайд этилишича, горилла шунингдек жуда ҳам меҳрибон ота.

Ҳайвонот боғи матбуот котиби Такаюси Исикава Шабанининг бу шуҳратини кутилмаганда содир бўлганини айтмоқда. “Бу интернет-жамоатчилик учун идеал намуна бўла олади. Бу ҳолат бизни жуда ҳайратлантирди”, деб айтди у CNN га берган интервьюсида.