Канаданинг BlackBerry компанияси смартфонлар савдосининг тушуми ижобий кўрсаткичларни қайд этмаётгани туфайли молиявий жиҳатдан оғир аҳволда қолмоқда.

Бу вазиятда компания бош директори Жон Чен ҳар қандай янги лойиҳани амалга оширишга тайёр турибди ва бу борадаги таклифларни кутмоқда.

Mackenzie Richmond Hill Hospital шифохонасида бўлиб ўтган матбуот анжумани вақтида Жон Чен BlackBerry компанияси тиббиёт ходимлари учун бактериялардан ҳимояловчи, стерилланган телефонлар ишлаб чиқариш ниятида эканини маълум қилди. У шундай ғоя мавжудлигини, бу ғоя ҳаётга тадбиқ этилиши учун тиббиёт ходимларининг қўллаб-қувватлаши кутилишини таъкидлаб ўтган.

Ўз навбатида бу учрашув вақтида сўз олган бош шифокор Авив Гладман тиббиёт ходимлари иш вақтида инфекция юқтириб олиши катта муаммога айлангани ҳақида гапирган. 


Гладманнинг айтишича, шифокорлар ва ҳамшираларнинг телефонлари орқали бемор ётган хонадан вируслар ташилиши ҳолатлари учрамоқда.

Mackenzie Richmond Hill Hospital касалхонасида матбуот анжумани иштирокчилари бўлган BlackBerry, Cisco ва ThoughtWire ўзаро ҳамкорлик шартномаси тузишди.