29 июнь куни россиялик фазогир Геннадий Падалка коинотда парвозда бўлиш давомийлиги бўйича жаҳон рекордчисига айланди, деб хабар бермоқда РИА “Новости” ахборот агентлиги.

Маълумотларга кўра, бу борадаги аввалги рекорд Собиқ иттифоқ ва Россия фазогири Сергей Крикалевга тегишли бўлган. Крикалев коинотда аввал “Мир” станциясида, кейин эса Халқаро коинот станциясида умумий ҳисобда 803 кун 9 соат 41 дақиқа давомида парвоз қилган.

Геннадий Падалка янги рекордга 29 июнь куни Москва вақти билан 1:02 да эришди. Агар Падалка режа бўйича “Союз ТМА-16М” капсуласида жорий йилнинг 11 сентябрида Ерга туширилса, унда фазогирнинг коинотдаги умумий парвози давомийлиги 877 кунни ташкил қилади.