Дубайда 3D-босма ёрдамида қурилган дунёдаги биринчи офис биноси қад кўтаради, деб хабар бермоқда Reuters ахборот агентлиги.

Ушбу қурилишни Дубай ҳукумати ва 3D-принтерлар бозорида ўзини биринчилардан бўлиб намоён этган Хитойнинг WinSun Global компанияси амалга оширади.

Қайд этилишича, янги бино 185 кв метр майдонда 6 метрли принтер ёрдамида қатлам-қатлам қилиб босиб барпо этилади. Қурилиш материаллари сифатида гипс, темирбетон, пластик ва темир тўрга эга шиша тола ишлатилади.



Қурувчилар босма ёрдамида нафақат бинонинг асосий элементларини, балки ички безаклари ва мебель жиҳозларини ҳам яратишни режалаштиришмоқда.

Лойиҳа ташкилотчилари бундай технологиядан фойдаланиш классик усулдаги қуришга нисбатан вақтни 50-80 фоизга тежашга ёрдам беришига ҳамда меҳнат сарфларини минимал даражага келтиришга умид билдирмоқда.

Ушбу қурилиш жорий йилда бошланган “Museum of the Future” (“Келажак музейи”) лойиҳасининг бир қисми ҳисобланади.