2 июль бутун дунёда "Номаълум учар жисмлар куни" сифатида нишонланади. Ушбу байрам, америкаликларнинг таъкидлашларича, 1947 йил 2 июлда АҚШнинг Нью-Мексико штатидаги Розуэлл шаҳарчаси яқинидаги чўл ҳудудида ўзга сайёрликлар “учар ликопчасининг” фалокатга учрагани билан боғлиқ ҳолда нишонланади.

АҚШ махсус хизматлари бу иш бўйича барча ҳужжатларни махфийлаштирганлар, бироқ айнан “Розуэлль воқеаси” деб аталган ушбу воқеадан уфология (ўзга сайёраликлар ҳақидаги маълумотларни ўрганувчи фан) тарихи бошланган. Ҳар йили Розуэллда ушбу кунга бағишланган фестиваль ўтказилиб, унга 200 мингдан кўпроқ одам ташриф буюради.

Ушбу кунда уфология ихлосмандлари ўз давлатлари раҳбарларига НУЖ ҳақидаги маълумотларни ошкор этишни сўраб мактублар йўллашади. Кўпчилик одамлар ўз давлатлари раҳбарлари ўзга сайёраликлар ҳақида оддий одамларга кўра кўпроқ маълумотга эгалар, деб ўйлашади.

2 июль куни “ерликлар” “НУЖ кетидан пойлашга” тушишади, улар ўз фотоаппаратлари ёки видеокамералари обюъективларини НУЖни тасвирга олиш илинжида осмонга йўналтирадилар. Статистикага кўра, июль ойида фан тили билан тушунтириб бўлмайдиган турли ғайриодатий воқеалар рекорд даражада кўп содир бўлади.