Ҳинд океани ҳудудида 2014 йилнинг мартида ғойиб бўлган Malaysia Airlines авиакомпаниясига тегишли Boeing 777-200 русумли йўловчи самолёт изларини қидириш ишлари тикланади. Бу ҳақда Австралия қидирув координация маркази (JACC) сайтида маълум қилинган.
 
Хабарда айтилишича, Fugro Discovery Discovery номли қидирув кемаси барча тайёргарликлардан ўтиб, Фримантал портидан самолёт қулаб тушгани тахмин қилинган ҳудудга томон йўлга чиқади ҳамда 2 июль куниёқ иш бошлайди.
 
Яна бир кема, Fugro Equator эса 6 июль куни қидириш ҳаракатларига қўшилади.
 
Қайд этилишича, қидириш ишлари майдони диаметри 60 минг километрдан 120 минг километргача кенгайтирилади.
 
Эслатиб ўтамиз, 2014 йилнинг мартида Куала-Лумпур шаҳридан Пекинга қараб йўлга чиққан ушбу самолёт йўналишдан бурилиб кетиб, Ҳинд океанининг жанубий қисмида ғойиб бўлганди. Самолёт бортида 227 йўловчи ҳамда 12 нафар экипаж аъзоси бор эди.