1939 йилда Чехословакияда нацистлар қўлидан яҳудий болаларни қутқариб қолгани билан таниқли бўлган британиялик Николас Уинтон 106 ёшида вафот этди, деб хабар бермоқда Reuters ахборот агентлиги.

1939 йилда Уинтон Чехословакияга ташриф буюриб, у ердан 600 дан кўпроқ яҳудий болаларнинг поездда Буюк Британияга кўчиб ўтишини ташкиллаштирган. Уинтоннинг бу хайрли иши унга “инглиз Шиндлери” деган ном келтирган. Уинтоннинг рафиқаси уйлари ертўласида турмуш ўртоғининг бу ишидан дарак берувчи ҳужжатларни топиб олмагунга қадар, у бу воқеани 50 йил давомида сир сақлаган.

2003 йилда Буюк Британия қироличаси Уинтонга рицарлик унвонини берди. Уинтоннинг Чехиядаги “шайдолари” унинг номзодини бир неча бор Нобель тинчлик мукофотига таклиф қилишган. Уинтон уруш гирдобидан болаларни қутқаргани учун 2014 йилнинг октябрида Чехиянинг “Оқ шер” ордени билан тақдирланган.