Тошкентда яшовчи Елена Шербакова ўзига тегишли пул ва пластик карточка солинган ҳамённи топиб, унга қайтариб бергани учун Тошкент Қўриқлаш бошқармаси 1-алоҳида батальони майори Баҳодир Эргашевга ўзининг катта миннатдорчилигини билдирди.

Аёлнинг айтишича, у таксига ўтираётганда ичида анча катта пул ва Трастбанк томонидан берилган пластик карточкаси ҳамда ўзининг кичкина ҳажмдаги сурати бўлган ҳамёнини тушириб қўйган.
“Бундан кўнглим жуда хира бўлди. Йўқотган пулларимга қанча нарса сотиб олишим мумкинлигини ўйлаб, эътиборсизлигим учун ўзимни койидим. Ва бироздан кейин “бўлган иш бўлди” деб секин-аста ўзимни тинчлантира бошладим. Шунда бирдан телефон жиринглаб қолди: “Еленамиз?”. “Ҳа” деб жавоб бердим. “Сизга Транстбанкдан қўнғироқ қиляпмиз – милиция ходими сизнинг карточкангизни олиб келди”. Мен: “Ҳамён ҳам бор эканми?” деб сўрадим. Менга жавоб беришди: “Ҳа ҳамёнингиз ҳам бор, агар буларни ҳақиқатда сиз йўқотган бўлсангиз банкка келиб олиб кетишингиз мумкин, сизга тегишли ҳамма нарса қайтариб берилади”. Мен 5 дақиқаёқ банкка етиб бордим ва у ерда Баҳодир Шавкатович ҳамёндаги суратим билан мени солиштириб, ҳамён эгаси эканлигимга ишонч ҳосил қилгандан кейин йўқотган ҳамёнимни ва ундаги барча нарсаларни тўла-тўкис қайтариб берди”, деб ёзмоқда Елена Шербакова ижтимоий тармоқлардан бирида.