Гарвард университети маъмурияти ҳамда санъат ва фанлар факультети хакерлар томонидан ҳужумга учради. ИТ-мутахассислар ҳужумнинг оқибатларини бартараф этгунларича ва унинг зарарини ҳисоблагунларигача талабалар ва ўқитувчилар бу вазиятдан бехабар бўлдилар. Университетда олиб борилаётган тадқиқотлар натижалари, фойдаланувчиларнинг шахсий ва молиявий маълумотлари зарар кўрмади. Бу ҳақда Tech Crunch хабар берди.

ИТ-мутахассислар Гарварднинг санъат ва фанлар факультети, маъмурияти ва яна 8 та ўқув муассасасидаги тизимларга бузиб кирилгани изларини аниқлашди. Ҳужумдан зиён кўрган муассасалар ходимлари ва ўқувчиларидан ўзларининг паролларини ўзгартиришлари ва барча қурилмалар: компьютерлар ва мобиль гаджетларда Гарвард тармоғидаги ўз аккаунтларига киришни янгилашлари сўралди. Университет фойдаланувчиларга 19 июнда содир этилган бу киберҳужум ҳақида фақатгина 1 июлда маълум қилди.

Университет маъмурияти бундай кечикишни хавфсизлик нуқтаи назаридан амалга оширилгани билан тушунтирди. ИТ-мутахассислар “ўзларининг ҳаракатлари тизимни ҳимоялаш ва ҳужум оқибатида етказилган зарарни камайтириш бўйича амалга оширилган чораларни хавф остига қўймаслигига” ишонч ҳосил қилишгандан кейин бу воқеа ҳақида фойдаланувчиларга айтишга қарор қилишган. Фойдаланувчиларнинг тармоқдаги ҳаракатлари вазиятни мураккаблаштириши мумкин эди, деб қўшимча қилди университет маъмурияти.