Тошкент вилоятининг Бўстонлиқ туманида истиқомат қилувчи боғбон ва тадбиркор Толибжон Раҳимов узоқ йиллардан буён 85-90 ёшли икки туп қадимий нав нок дарахтини парваришлаб келмоқда. Бу ҳақда “Менинг боғим” кўрсатуви асосида “Оила даврасида” газетаси ёзмоқда.

Айтилишича, ушбу дарахтлар берадиган мева нави тошнок деб аталади.

“Уни териб олгач, ертўлада 15-30 кун сақлаганимиздан сўнг чиройли тусга кириб, қовун каби юмшаб, сувли мевага айланади, – дейди Раҳимов. – Мевасини 15 сентябрдан 15 октябрга қадар териб оламиз. Ёшлигимда ҳам бу дарахтлар кичкина эди, ҳозиргача озроқ ўсган. Гап шундаки, бу нок нави жуда секин ўсади. Дадамнинг айтишича, 25 йилда ҳосилга кираркан. 18 деганда бир-икки дона нишона берганини эслайман. Куртак ёки искана пайванддан кўпайтирилади”.