Грецияда бўлгани каби, Украинада ҳам иқтисодий инқироз сиёсий инқирозни келтириб чиқариши мумкин. Бу ҳақда АҚШ Давлат департаментининг МДҲ давлатлари бўйича собиқ координатори, Билл Клинтон маъмурияти аъзоси бўлган Стивен Сестанович ёзмоқда.

Унинг сўзларига қараганда, Украина ва Грециядаги вазият ўзаро кескин фарқланади, лекин ҳар иккала давлатда ҳам иккита инқироз бир-бирига таъсир ўтказа бошлаган. Бундай вазиятда эса ҳукумат халқаро иттифоқчилар ва ҳомийлар билан тил топишишга қийналади.

Украинада ҳозирча бундай вазият юзага келмади, аммо масала мураккаблашиб бораётгани барчага ойдин. Жорий йилнинг биринчи чорагида мамлакат ялпи ички маҳсулоти 17 фоизга тушиб кетди, бош вазир Арсений Яценюк ва унинг маъмурияти рейтинги айтарли юқори эмас. Сестановичнинг фикрича, яқин орада Украина Халқаро валюта жамғармасига ва хорижий кредиторларга мурожаат қилишга мажбур бўлади.

“Украина президенти Пётр Порошенконинг ислоҳотлар ўтказишга бўлган интилишларига қарамай, у олигархдир. Мамлакат қашшоқлашишига қарамай, у супербой бизнесменлардан бири бўлиб қолмоқда. Натижада халқ мамлакатда ростан ҳам олигархларга қарши кураш кетаётганидан шубҳаланмоқда”, – хулоса қилади таҳлилчи.